వాయు కాలుష్య నివారణకు వారానికి ఒకసారైనా సైకిల్ వాడి వాయు నాణ్యత పెంచాలి: జిల్లా కలెక్టర్ డీకే బాలాజీ

వాయు కాలుష్య నివారణకు వారానికి ఒకసారైనా  సైకిల్ వాడి వాయు నాణ్యత పెంచాలి: జిల్లా కలెక్టర్ డీకే బాలాజీ

వాయు కాలుష్యం నివారించుటకు ప్రతి ఒక్కరూ వారానికి ఒకసారి అయినా సైకిల్ వాడి వాయు నాణ్యత పెంచాలని జిల్లా కలెక్టర్ డీకే బాలాజీ ప్రజలకు పిలుపునిచ్చారు. 

స్వర్ణాంధ్ర స్వచ్ఛ ఆంధ్ర కార్యక్రమంలో భాగంగా శనివారం నగరంలోని కలెక్టరేట్ ప్రాంగణంలో జిల్లా కలెక్టర్ నేతృత్వంలో కలెక్టరేట్ లోని వివిధ ప్రభుత్వ శాఖల అధికారులు, సిబ్బంది స్వచ్ఛత కార్యక్రమంలో పాల్గొన్నారు. 

తొలుత జిల్లా కలెక్టర్ తన భద్రత, క్యాంపు సిబ్బందితో కలిసి సైకిల్ పై కలెక్టర్ క్యాంపు కార్యాలయం నుండి బయలుదేరి కలెక్టరేట్కు చేరుకున్నారు. 

తదుపరి జిల్లా కలెక్టర్ వివిధ ప్రభుత్వ శాఖల అధికారులు సిబ్బందితో కలిసి కలెక్టరేట్లో ఈవీఎం గోదాము వెనకవైపు, డిఎస్ఓ, సర్వే భూ రికార్డుల కార్యాలయాల చుట్టుపక్కల చెత్తాచెదారాలను తొలగించి ట్రాక్టర్లకు ఎక్కించారు. 

ఈ సందర్భంగా జిల్లా కలెక్టర్ మీడియా ప్రతినిధులతో మాట్లాడుతూ రాష్ట్ర ప్రభుత్వం ప్రతినెల 3 వ శనివారం స్వర్ణాంధ్ర స్వచ్ఛ ఆంధ్ర కార్యక్రమాలను నిర్వహించడం జరుగుతుందన్నారు. ప్రతినెల ఒక ఇతివృత్తం (థీమ్ )ఎంచుకొని ఆ ప్రకారంగా వివిధ స్వచ్ఛత కార్యక్రమాలను చేపడుతున్నామన్నారు. 

ఇందులో భాగంగా గత 2 నెలలుగా ఉన్న ఇతివృత్తాలను ప్రతినెల 3 వ శనివారం వరకే పరిమితం చేయకుండా జిల్లాలో మిగతా శనివారాల్లో కూడా కొనసాగిస్తున్నామన్నారు. మొట్టమొదటి నెల అక్టోబర్ నెలలో వాయు కాలుష్యం ప్రధాన అంశంగా స్వచ్ఛ ఆంధ్ర కార్యక్రమం చేపట్టడం జరిగిందన్నారు. వాయు నాణ్యత పెంచాలంటే ప్రజలందరూ చాలా వరకు సైకిల్ ను వాడాలన్నారు. ఇందులో భాగంగా ప్రతి శనివారం కలెక్టరేట్లో పని చేసే ప్రతి ఉద్యోగి నడుచుకుని గాని లేదా సైకిల్ పైన గాని రావాలని సూచించామన్నారు. 

అంతేకాకుండా విజయవాడ నుండి మచిలీపట్నం వచ్చే అధికారులు విడివిడిగా కాకుండా ముగ్గురు నలుగురు అధికారులు కలిసి ఒకే వాహనంలో రావాలని సూచించామన్నారు. 

ఈ నవంబర్ నెలలో సామాజిక హైజిన్ ఇతివృత్తంతో పనిచేస్తున్నామన్నారు. ఇందులో భాగంగా కలెక్టరేట్ పరిసరాల్లో ప్రతి శనివారము ఉద్యోగులందరూ కలిసి చెత్తాచెదారాలను తొలగించి శుభ్రం చేయడం జరుగుతుందన్నారు. చెత్తాచెదారాలను పూర్తిగా తొలగించాక కలెక్టరేట్లో సుందరీకరణ పనులు చేపడతామన్నారు. ఒకసారి చెత్తాచెదారాలు తొలగించాక మరల కలెక్టరేట్లో ప్రాంగణంలో చెత్త కనబడకుండా తగు చర్యలు తీసుకుంటున్నామన్నారు. 

ఈ కార్యక్రమంలో డీఎస్ఓ మోహన్ బాబు, బీసీ సంక్షేమ అధికారి రమేష్, భూ సర్వే రికార్డుల ఏడి జోషిలా, బీసీ కార్పొరేషన్ ఈడీ రాజేంద్ర, సమాచార పౌర సంబంధాల శాఖ డిడి వెంకటేశ్వర ప్రసాద్, జిల్లా పర్యాటక అధికారి రామ్ లక్ష్మణ్, మున్సిపల్ కమిషనర్ బాపిరాజు, సహాయ కమిషనర్ గోపాలరావు, కలెక్టరేట్ ఏవో రాధిక కలెక్టరేట్లోని వివిధ ప్రభుత్వ శాఖల సిబ్బంది పాల్గొన్నారు.